أداب الحديث ( الجزء الأول )

 عن المجتمع النسائي أتحدث .. فلو كانت أداب الحديث ضعيفة في السنوات الماضية فحالياً أصبحت أراها تجري نحو الإنعدام .

فأصبح الكثير لا يفهم أو لنقل لا يتقبل من هو مختلف و لا يقفون عند عدم التقبل بل تطوروا و أصبحوا يتحرشون بهم و يضايقونهم و يعينون أنفسهم أوصياء عليهم و يفرضوا عليهم ماهو في اعتقادهم هو الصحيح و السليم  و لكم بعض الأمثلة للأحاديثهم :

الحديث الأول مع فتاة وصلت لسن يعتبرونه سن العنوسة .. 

- أهلين كيف حالك ؟ شني أخبارك ؟ ( و العيون على يدين البنت باش تشوف لو لابسة دبلة أو لا ) 

• الحمدلله بخير و كيف حالك ؟ 

- شني !!؟؟ هااااااااااأ ( هو انت جيت يا رمضان شهقة .. على قولة سعيد صالح) مافيش حويجة هاااااأ !؟! معقولة لتوا ؟! 

• مازال النصيب ماجاش .. و كيف حال فولانة ؟! ( في محاولة منها لتغيير الموضوع ) 

- باهية باهية .. تي كيف لتوا ؟!  نشطي روحك و شوفي نفسك مش معقولة لتوا !!؟؟ شني مش عاجبك حد !! راهو اللي اصغر منك صغارهم بيخشوا للمدرسة ( شكله سباق و احني مش عارفين ) !! لا لا لا مش مزبوط هكي راهو !! معادش تشرطي اللي يجيك باهي راك كبرتي و معادش عندك فرص باش تحلي عسلك معقولة لتوا مافيش واحد عجبك و هدرزتي عليه و جبتيه الطريق وووووو ..  

و كأنها الأخت مش عايشة في مجتمعنا و عارفة انه البنت ماعندهاش يد في الموضوع !؟ و تحرض على الحرام فوق البيعة !!؟؟ كم أنت نزيكة 

الحديث الثاني مع شابة متزوجة من سنوات و لم تنجب 

- كيف حالك و حال زوجك ؟!

• الحمدلله بخير و انت كيف حالك ؟

- باهية .. شني مافيش حويجة هكي و لا هكي ؟! ( و تشوف لبطنها !) 

حتكون اجابتها واحد من الاثنين : 

• لا مازال ربي ماكتبش .. او .. حملت و أجهضت ربي مش كاتبلنا مازال 

- لا كيف ساكتة على روحك لتوا !!؟؟ شوفي الدكتور الفولاني مافيش من مشتله و ما حملتش ! و الا نقولك في واحدة جربت الخلطة هادي ( و خودلك وصفات طبية و ادوية و اعشاب اشكال و الوان ماهو كلهم خبراء و هذا غير اللي تخشلك على خط الشعوذة و السحر ) نشطي روحك باش ما يقلقش و هو يستنى بعدين ياخد عليك و تقعدي فاتحة فمك !! ( يا طيبة يا ام قلب كبير )

يعني هي لما بتطلع المراة بتغير جوها تنكدوا عليها و تفكروها و تزيدوها على ما بيها !! لما تلاقوها هدرزوا تهدريز عام و ضحك و اكسبوا اجر يا نازكات 

و لي عودة بالنازكات الثانيات

#أنا_أدون