ذات مومينت لما تخش لإمتحان و تبدأ قاري حمادة و تنصدم بالأسئلة حمادة ثاااااااني خااااااالص .. استنوا المومينت مش اهني .. و تبدأ مزبهل في الأسئلة و يجيك المراقب الباكستاني و يقولك بالانجليزي لهجة باكستانية : السلام عليكم ار يو أمسلم ؟!
- عليكم السلام الحمدلله مسلمة تقريباً واضح من حجابي !؟!
- ايه صح .. اوكي من وين اصلك ؟!
- امممم ليبيا !!! ( و في عقلي نقول : ياراجل نبي نمتحن و نكمل خلعتي اتركني لوحدي )
- لبنان ؟!
- لا ليبيا !
- تعرفي اديري حُمص ( يقصد طحينة الحمص ) ؟!
- لا ( هذا خيره !!؟؟ )
- تعرفي واحدة تعرف ادير حُمص ؟!
- لا ( هي البلاوي ديه بتتحدف عليا حتى في امريكا .. نحس فيه راكبه جن اسمه حمص ) انت لو تبي حُمص راهو يبيعوا فيه في المحل الفولاني !!
_ لا أنا نبي نتزوج مسلمة تعرف ادير حُمص لأني نحبه هلبة لكن توا نمشي نشريه .. ماعندكش صاحبات مسلمات مش متزوجات يعرفو يديرو حمص ؟!
- لا كلهم متزوجات !!
و مشي و خلاني .. الراجل يبي يتزوج مسلمة و سقف طلباته انها تعرف اديرله حمص ما طلبش شكلها او لونها و لا طلب بنت وزير و لا غني !! تعالى و شوف ليستة الطلبات اللي يبوها في العروسة عندنا اطول حتى من كاتالوج الثلاجة !!
زعمة مني اللي صح ؟ كاتالوج الثلاجة او طحينة الحمص ؟
يالله المهم اللي تعرف ادير طحينة الحمص توقف طابور و معاها 2$ لزوم تقديم طلب الزواج
أنا_أدون
ليست هناك تعليقات:
إرسال تعليق